CuracaoSPORT
CuracaoSPORT.com

Apertura Atletismo 2015

Atletismo a duna inisio na temporada 2015; ban pa MIHÓ, un temporada dediká na e konosido coach i instruktor di atletismo sr. Wendell Prince. Curaçaose Atletiek Bond durante su ùltimo reunion general a nombra Sr. Wendell komo miembro di honor di e federashon di atletismo komo muestra di apresio pa 5 dékada di dedikashon na hubentut di Kòrsou.
Nos a sinti nos mes sumamente honra ku presensia di sr. Henry Prince, tata di sr. Wendell Prince, den pasado un tremendo atleta den e displina di bula leu, miembro di salon di fama di Kòrsou i antes presidente di komite olimpiko di Antia Hulandes. Tambe tabata presente srs. Aubrey Linzey i Erwin Martis, ambos miembro di honor di nos federashon. Federashon di deporte i olimpiko di Kòrsou tambe tabata representá pa srs. Rein Persaud i Ruthsel Martina.

Den su diskurso Wendell a trese dilanti ku Kòrsou tin hopi talento. “Nos muchanan lo por ser desaroyá solamente si nan hasi e deporte ku hopi disiplina, amor i dedikashon. Pa juda esaki nos mester di mas hoben entrenadó pa dediká tempu den formashon di e hobenan aki. Mi a dedika hopi tempu na e deporte i na nos muchanan pasombra mi stima tur mi muchanan.” Esaki tabata palabranan di sr. Wendell Prince.

Wendell_Family

Despues di un seremonia hopi animá e propio Wedell Prince ta duna  siñal pa apertura ofishal di temporada 2015.
Federashon di atletismo ta jama danki na tur esnan ku a presensia e seremonia di apertura; nos baluartenan, atletanan, mayornan, fanatikonan di e deporte i nos propio dirigentenan.

Den nos komunikado di mañan nos lo elaborá riba nos promé kompetensia ku a marka apertura di temporada 2015 dedika na Wendell Prince bou di e lema “nos ta ban pa MIHÓ!”