CuracaoSPORT
CuracaoSPORT.com

Marcos ta gana kompetensia di ahedres di Curacao Chess Academy

Deze post is ook beschikbaar in: Dutch

Den kuadro di selebrashon di 55 anya di eksistensia di sentro di bario Sta. Maria, Curacao Chess Academy (CCA) a tene un kompetensia di ahedres djasabra ultimo pa su alumnonan. Ta for di ana 2009 CCA ta organisa proyektonan di ahedres pa mucha na diferente sentro di bario lokal.

Na sentro di bario Sta. Maria tin aktividatnan di ahedres ta tumando luga pa algun anya kaba ku sosten finansiero di Banco di Caribe. Resientemente CCA tabata kontentu di keda informa ku Banco di Caribe a bolbe alarga nan apoyo na e proyekto di ahedres na sentro di bario Sta. Maria ku un periodo di 1 anya.

E kompetensia di ahedres di djasabra ultimo tabata konsisti di 5 buelta segun e sistema Suiso i tabata meskla pa mucha muhe i mucha homber.

Taqesyah Marcos a resulta e ganador invikto ku 5 punto for di 5 partido. Jonathan Brigita a sigui na di dos luga ku 4 punto, mientras Daniela Wanga a termina na di tres luga ku 3 punto.

Mas aleu a parti 3 premio na e tres miho finalistanan ku ta partisipando pa prome biaha na un kompetensia di ahedres. E tres premionan di estimulo aki a keda gana pa Jian We Li ku a sali prome, sigui pa Jeanot Martien na di dos luga i Jorjino Kirindongo na di tres luga.

E premionan tabata obsekio di e sentro di bario i a keda entrega na final pa sr. Franklyn Simon, miembro di direktiva di sentro di bario Sta. Maria i sr. André Mardenborough miembro di direktiva di CCA.

359

E weganan di ahedres na sentro di bario Sta. Maria tabata hopi interesante di komienso te fin i e muchanana a disfruta na abundansia den un tremendo esfera di kompetensia.